«ՀայաՔվե»-ն ներկայացրեց Հայաստանի ազգային անվտանգության հայեցակարգը

Օրերս «ՀայաՔվե» ազգային քաղաքացիական միավորումը հրապարակեց Հայաստանի ազգային անվտանգության ռազմավարության հայեցակարգը։ Այս նախաձեռնությունը, թերևս, առաջին համակարգային փաստաթուղթն է, որը ներկայացվում է ազգային անվտանգության հայեցակարգի հարցում։

Ի տարբերություն գործող իշխանության, որը վեց տարի շարունակ չի ներկայացրել նման հայեցակարգ, «ՀայաՔվե»-ն վերցրել է պատասխանատվություն՝ մշակելով ամբողջական և համակարգային մոտեցում, որը հստակ նշում է Հայաստանի արտաքին և ներքին սպառնալիքները, ինչպես նաև մեր ազգային շահերը։ Հայեցակարգը նաև նախանշում է այն խնդիրները, որոնք պետք է լուծել՝ երկիրը սպառնալիքներից պաշտպանելու համար։

Այս ծավալուն աշխատանքին մասնակցել են բազմաթիվ փորձագետներ, և դրա մշակումը տևել է մեկ տարի։ Հայեցակարգի ներկայացմանը մասնակցել են անվտանգության ոլորտի ինը հեղինակավոր փորձագետ և ավելի մեծ փորձագիտական խումբ, ինչը վկայում է աշխատանքի բարձր որակին և հիմնավորվածությանը։

«ՀայաՔվե»-ի համակարգող Ավետիք Չալաբյանը նշում է, որ միավորումը հասկանում է, որ խնդիրը ոչ միայն իշխանափոխությունն է, այլև դրանից հետո պետության կառավարման համար հստակ հայեցակարգ ունենալը։ Նա ընդգծում է, որ «ՀայաՔվե»-ն «մտածում է մի քանի քայլ առաջ»՝ մշակելով այնպիսի մտավոր աշխատանք, որը կարող է ծառայել որպես հիմք նոր իշխանության համար՝ ազգային անվտանգության համապարփակ ռազմավարություն մշակելու նպատակով։

Ըստ Ավետիք Չալաբյանի՝ հայեցակարգի վերաբերյալ մասնագիտական արձագանքը շատ դրական է։ Այն կլրամշակվի և կներկայացվի հանրությանը՝ հավելյալ քննարկումների, հանդիպումների և հոլովակների միջոցով։ Ընդդիմադիր դաշտին կտրամադրվի ամբողջ փաստաթուղթը՝ որպես մտավոր ակտիվ, որի շուրջ կարելի է բանավիճել և զարգացնել։

Ավետիք Չալաբյանը նաև տարբերակում է հայեցակարգի և ռազմավարության հասկացությունները՝ նշելով, որ հայեցակարգը հիմնական գաղափարներն է, իսկ ռազմավարությունը դրանց կիրառման և իրականացման ռեսուրսների և ժամանակացույցի վրա հիմնված պլանավորումն է։ Նրա կարծիքով՝ իշխանությունը, որը ունի իշխանություն և ռեսուրսներ, պետք է լինի այն կողմը, որը կարող է մշակել ռազմավարությունը՝ հիմնվելով հայեցակարգի վրա։