Ռուսաստանի և Նոր Նախիջևանի հայոց թեմի հոգևորականի հարցազրույցը

Իմ հարցազրույցում Ռուսաստանի և Նոր Նախիջևանի հայոց թեմի Յարոսլավի մարզի հոգևորական Տեր Առաքել քահանա Ամիրյանը խոսեց ներկայիս իրավիճակի և Եկեղեցու ներսում տեղի ունեցող իրադարձությունների մասին։

Նրա խոսքով՝ թեմի քահանաները միաձայն և անշեղորեն իրենց հավատարմությունն ու աջակցությունն են հայտնում Ամենայն Հայոց Հայրապետին՝ ցուցաբերելով խոնարհություն։ Տեր Առաքելը նշեց, որ որոշ հոգևորականներ, սակայն, շեղվում են իրենց կոչումից՝ համագործակցելով իշխանությունների հետ, որոնց նպատակն է Հայ Եկեղեցու մասնատումն ու թուլացումը։ Նա ընդգծեց, որ նման գործողությունները չեն կարող ներկայացնել Եկեղեցու իրական ձայնը։

Անդրադառնալով կալանավորված Միքայել, Բագրատ և Մկրտիչ սրբազանների՝ Վեհափառին ուղղված պահանջին, Տեր Առաքելը նշեց, որ նրանք, թեև անազատության մեջ, շարունակում են մասնակցել Եկեղեցու կանոնական կյանքին և իրավունք ունեն արտահայտելու իրենց դիրքորոշումը։ Նրանք դիմել են Վեհափառին՝ խաղաղություն հաստատելու և շեղումներ կանխելու նպատակով՝ առաջարկելով համապատասխան քայլեր, ինչպիսիք են թեմակալ առաջնորդների գործունեության ժամանակավոր կասեցումը և եպիսկոպոսների ժողովի հրավիրումը։ Տեր Առաքելը վստահ է, որ առաջիկա եպիսկոպոսների ժողովը կտա լիարժեք գնահատական և կընդունի համապատասխան որոշումներ։

Նա նաև անդրադարձավ Ռուսաստանի թեմի հոգևորականների կողմից Եկեղեցուն աջակցող հայտարարությանը։ Ըստ նրա՝ միակ հոգևորականը, ով չի միացել այդ հայտարարությանը, Տեր Հակոբ քահանա Սարոյանն է, Գևորգ եպիսկոպոս Սարոյանի եղբայրը։ Տեր Հակոբը, որի քաղաքական դիրքորոշումը նախ ծածկված էր, այժմ բացահայտ կանգնած է իշխանության կողմում։ Տեր Առաքելը, անձնական փորձառության պատճառով, նախընտրում է չգնահատել նրա ներկայիս քայլերը։

Եզրափակելով, Տեր Առաքելը կրկին ընդգծեց իր և թեմի քահանաների անշեղ հավատարմությունը Վեհափառ Հայրապետին և հավաստիացրեց, որ նրանք շարունակելու են աղոթել, որպեսզի շեղված հոգևորականները վերադառնան իրենց կոչմանը։