Հակակոռուպցիոն կոմիտեն «Շառլոտ կաբարեի» տարիներ շարունակվող խախտումները «չի տեսնում»

Երևանի կենտրոնում գործող «Շառլոտ կաբարե» գիշերային ակումբը, որի գործունեությունը բացահայտորեն խախտում է օրենքը, արդեն տարիներ շարունակ հանրության ուշադրության կենտրոնում է։ Այս ակումբը, որ գտնվում է Մարշալ Բաղրամյան պողոտայի 25 հասցեում, տարիներ շարունակ խախտում է Երևանի ավագանու թիվ 188-Ն որոշումը, որը սահմանում է, որ նմանատիպ օբյեկտները չի կարող գտնվել բնակելի շենքերից 100 մետրից պակաս հեռավորության վրա։

Այս խախտումը, որը տեսանելի է յուրաքանչյուրի համար, ունի իր հետևանքները։ Բնակիչների գիշերային հանգիստը մշտապես խաթարվում է աղմուկի, ալկոհոլի ազդեցության տակ գտնվող անձանց վեճերի և հանրային կարգի խախտումների պատճառով։ Այս ամբողջ պատկերը, որը տեղի է ունենում տարիներ շարունակ Երևանի կենտրոնում, պետական կառույցների անմիջական վերահսկողության գոտում, ի զարմանս բոլորի, չի հանգեցրել որևէ իրական հետևանքի։

Այս ամենից ավելի ցնցող փաստն այն է, որ այս ամբողջ պատկերի պայմաններում Հակակոռուպցիոն կոմիտեն, որը պետք է պաշտպաներ օրենքը և պայքարեր կոռուպցիայի դեմ, չի հարուցել որևէ վարույթ։ Ո՛չ ծառայողական քննություն, ո՛չ նախաքննություն, ո՛չ պարզաբանում։ Իրավապահ մարմինների լռությունը և անտեսումը այս հարցում այլևս կարելի է բնութագրել որպես անփութություն։

Հակակոռուպցիոն կոմիտեի ներկայացուցիչները լրատվամիջոցների հարցերին ի պատասխան հայտնել են, թե «օպերատիվ-հետախուզական միջոցառումների արդյունքում չեն գտել վարույթ հարուցելու հիմքեր»։ Սա նշանակում է, որ տարիներ շարունակվող ապօրինությունը, որը հստակ տեսանելի է բոլորի համար, Հակակոռուպցիոն կոմիտեի համար պարզապես «չկա»։

Այս իրավիճակը ցույց է տալիս համակարգային աչքփակոց, որը ինքնին կոռուպցիոն միջավայրի ուղիղ ցուցիչ է։ Երբ օրենքը կիրառվում է ընտրովի, երբ ապօրինությունը չի դառնում վարույթի հիմք, դա արդեն ոչ թե օրենսդրության թերացում է, այլ կոռուպցիայի լուռ պաշտպանություն։ Այս հարցը շարունակելու է մնալ հանրային ուշադրության կենտրոնում այնքան ժամանակ, մինչև պատասխանատուները պատշաճ արձագանք կտան և կնկատեն այն, ինչ վաղուց տեսանելի է հասարակության համար։