ՀՀ Կադաստրի կոմիտեն ներկայացրել է օրենսդրական փոփոխությունների մի փաթեթ, որի նպատակն է լուծել 2021 թվականի դեկտեմբերի 16-ի ՀՕ-397-Ն օրենքի կողմից ստեղծված իրավական բացը։ Այս փոփոխությունները վերաբերում են «ՀՀ Քաղաքացիական օրենսգրքում լրացումներ և փոփոխություններ կատարելու մասին» օրենքին և «Տեղական տուրքերի և վճարների մասին» օրենքին։
Ներկայիս օրենսդրության համաձայն՝ օրենքի ուժի մեջ մտնելուց հետո կառուցված ինքնակամ կառույցների օրինականացման հնարավորությունը սահմանափակվում է այն դեպքերով, երբ դրանց քանդումը կհանգեցնի արդեն իսկ ձևավորված տնտեսական և սոցիալական արժեքի կորստի։ Գործնականում հաճախ հանդիպում են նման դեպքեր, երբ նման կառույցների քանդումը ոչ միայն տնտեսական, այլև սոցիալական հետևանքներ է ունենում։
Այս իրավիճակը հաշվի առնելով՝ առաջարկվում է սահմանել նոր իրավական մեխանիզմներ, որոնք կթույլ տան անհատական գնահատման արդյունքներով և խիստ պայմանների պահպանմամբ դիտարկել օրենքով սահմանված ժամկետից հետո կառուցված որոշ ինքնակամ կառույցների հաշվառման և օրինականացման հնարավորությունը։
Նախագծերով նախատեսվում է, որ ֆիզիկական կամ իրավաբանական անձանց սեփականության իրավունքով պատկանող հողամասերում առկա այն ինքնակամ կառույցները, որոնք կառուցվել են օրենքով սահմանված ժամկետից հետո, կարող են հաշվառվել և ընդգրկվել կառավարության հաստատած օրինականացման ենթակա ինքնակամ շինությունների ցանկում՝ մինչև 2027 թվականի դեկտեմբերի 30-ը։
Այս ցանկում ընդգրկման և հետագա օրինականացման համար սահմանվում են մի շարք պայմաններ, այդ թվում՝ համապատասխան լիցենզիա և ներդիր ունեցող անձի կամ կազմակերպության տված դրական եզրակացությունը, իրավասու մարմնի նախնական գնահատման իրականացումը, ինչպես նաև օրինականացման համար սահմանված տեղական տուրքի վճարումը։
Ներկայացված փաթեթի շրջանակում «Տեղական տուրքերի և վճարների մասին» օրենքում նույնպես կատարվում են լրացումներ՝ սահմանելով նշված ինքնակամ կառույցների օրինականացման համար գանձվող տուրքի տեսակը և դրույքաչափը։
